На «Дажынках» у Шклове зрабілі карту Беларусі з каўбасы

На абласных «Дажынках» у Шклове паказалі карту Беларусі, выкладзеную з каўбасы, сала і мясных рулетаў. На ёй пазначылі шэсць абласных цэнтраў і сельскагаспадарчае прадпрыемства «Александрийское» са Шклоўскага раёна.

Чытайце таксама: «Горад расцвітае мёртвымі кветкамі»: жыхары Калінкавічаў не ацанілі добраўпарадкаванне да «Дажынак»

Карта размешчаная на драўлянай аснове з выразанай назвай ААТ «Александрийское». Унутры контуру Беларусі раскладзеныя дзясяткі відаў мясных прадуктаў, а асобныя ўчасткі падзеленыя палоскамі зеляніны. Зверху кампазіцыю накрылі харчовай плёнкай, заўважыла «Магілёў.медыя».

@user3655939075300 #шклов #дожинки #октябрь #нарезка ♬ оригинальный звук — Добрый человек

На карце стаяць драўляныя таблічкі з назвамі Брэста, Віцебска, Гомеля, Гродна, Мінска, Магілёва і «Александрийского». Участак, прысвечаны гаспадарцы, упрыгожылі ружачкамі з мясных рулетаў. Таблічка з яе назвай па памеры не саступае мінскай.

ААТ «Александрийское» уваходзіць у аграхолдынг Кіраўніцтва справамі. Александрыя — родная вёска Аляксандра Лукашэнкі, дзе штогод праводзяць фестываль «Купалле». На сёлетніх «Дажынках» гаспадарку назвалі найлепшай у Магілёўскай вобласці па ўраджайнасці.

У ліпені 2026 года Лукашэнка таксама абяцаў зрабіць Шклоўскі раён узорным, каб яго можна было капіраваць па ўсёй краіне.

Бусел у клетцы і іншыя ўпрыгажэнні да свята

Напярэдадні свята ў горадзе фарбавалі фасады будынкаў, укладвалі новую плітку і ўсталёўвалі тэматычныя інсталяцыі каля прадпрыемстваў і ўстановаў.

Кожны калектыў рыхтаваў уласны арт-аб’ект. Раённая газета апісвала інсталяцыі як «асэнсаванае мастацкае выказванне», у якім адлюстраваліся вытворчыя традыцыі, прафесійны гонар і сувязь пакаленняў.

Адна з найбольш заўважных кампазіцый — белы бусел з распасцёртымі крыламі ўнутры металічнай канструкцыі, падобнай да глобуса. Птушка стаіць на жалезнай падстаўцы каля будынка з аранжавым фасадам. Канструкцыя складаецца з дуг, якія імітуюць мерыдыяны і паралелі, а звонку яе абрамляе вялікая дуга ў чырвона-зялёных колерах.

Бусел — адзін з пазнавальных сімвалаў Беларусі, які асацыюецца з родным домам і вяртаннем. Таму яго размяшчэнне ў замкнёнай металічнай канструкцыі выглядае неадназначна: вобраз птушкі, якая звычайна асацыюецца са свабодай, аказаўся ўнутры метлічнай клеткі.

Раённая газета не тлумачыла сімвалічны сэнс гэтай кампазіцыі, таму невядома, ці закладвалі аўтары ў яе нейкі дадатковы змест.

Чытайце таксама: Бусел у клетцы. Так у Шклове ўпрыгожылі горад да «Дажынак»

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро